სადამრიგებლო საათის გეგმა N3

მე–7 კლასის სადამრიგებლო საათის გეგმა N3 2017 წლის 19 ოქტომბერი

კლასის ხელმძღვანელი: მზია კახაძე

მიმართულება–პიროვნული, მორალური და სოციალური განვითარება

თემა: მე შემიძლია სიბრაზის მართვა

მიზანი:მოსწავლეებში საკუთარი თავის მართვის უნარის განვითარება

ვეკითხები მოსწავლეებს, თუ რას გრძნობენ ისინი, როდესაც უსამართლობის, დაჩაგრვრის ან აგრესიის შემსწრები ხდებიან?

როგორია სიბრაზის განცდა? რას ვგრძნობთ, როდესაც ვბრაზდებით?

განვუმარტავ მოსწავლეებს, რომ უსიამოვნო სიტუაციაზე გაბრაზება ჩვეულებრივი რეაქციაა, რასაც ფიზიოლოგიურადაც ვგრძნობთ ხოლმე, მაგალითად: გულისცემის გახშირება, კუნთების დაჭიმვა...

ხოლო, როგორ ვიქცევით არასასიამოვნო სიტუაციის დროს, ეს უკვე ჩვენს ხასიათზე, ტემპერამენტსა და საკუთარი თავის მართვის უნარზეა დამოკიდებული.

შემდეგ ვსთხოვ მოსწავლეებს, გაიხსენონ, თუ რა აბრაზებთ მათ თანატოლებს ყველაზე ხშირად? არის თუ არა შესაძლებელი თავის არიდება ან სხვაგვარი დამოკიდებულება აღნიშნული საკითხის მიმართ?

როგორ იქცევიან მოსწავლეები, როდესაც ბრაზდებიან?

მოსწავლეებმა შესაძლოა, ღიად გამოხატული აგრესიული ქცევები ჩამოთვალონ. ველითხევი მათ, ხომ არ იწვევს აღნიშნული ტიპის ქცევები პრობლემების გამრავლებას. მაგალითად დაპირისპირება სერიოზულ ჩხუბში გადაიზარდა, მშობლები ჩაერთვნენ, ამის გამო კომუნიკაცია ხომ არ შეწყვიტეთ და  ა. შ.

ამის შემდეგ ვეკითხები მოსწავლეებს, თუ რა გზებს მიმართავენ ისინი სიბრაზის გრძნობასთან გასამკლავებად?

ვსთავაზობ გამოსავალს: ზოგჯერ ადამიანი იოლად მშვიდდება გუნებაში ოცამდე დათვლით, ზოგს სასიამოვნო სიტუაციის მოგონება შველის, ზოგს ,,სიბრაზის გრძნობის“დახატვა, ზოგისთვის ლი სპორტული აქტივობებია ყველაზე ეფექტური.

ვესაუბრები ასერტული– თავდაჯერებული ქცევის მნიშვნელობაზე, ვუხსნი, რომ ადამიანები სხვადასხვაგვარად იქცევიან პრობლემურ სიტუაციაში:

ზოგი აგრესიულად იქცევა – აგრესიულია ადამიანი, რომელიც არ ისმენს სხვის აზრს, მუდამ ჩხუბობს, ხმამაღლა საუბრობს.

ზოგი გაუბედავად იქცევა– უჭირს საკუთარი აზრის გამოთქმა, ლაპარაკობს ხმადაბლა, ძალიან იოლია მისი დაყოლიება.

ზოგი თავდაჯერებულია–საუბრობს მშვიდად, კამათისას ყოველთვის გამოთქვამს საკუთარ აზრს, აფიქსირებს, თუ რას გრძნობს პრობლემური სიტუაციის დროს, მოწინააღმდეგესაც ეკითხება მის პოზიციასთან დაკავშირებულ მოსაზრებას, ეძებს გამოსავალს.

განვიხილავთ შემდეგ სიტუაციას:

,,ნატო დაბადების დღის აღსანიშნავად ემზადება. ის სტუმრების სიას ადგენს. საზეიმო სამზადისში მას უახლოესი მეგობარი, თამუნა ეხმარება. ნატომ სიაში ჩაწერა მეზობელი გოგონა სოფო. აღმოჩნდა, რომ თამუნას არ მოსწონს სოფო და ნატოს უთხრა, ეს სოფო არ დაპატიჟოო. სოფო ნატოს ძალიან ახლო მეგობარია და თამუნას ნათქვამზე გული სტკივა“

ნატო აგრესიულად რომ მოქცეულიყო, თამუნას წაეჩხუბებოდა – სოფო თუ არ მოგწონს ვიზამ რამესო...

თავდაჯერებულად რომ მოქცეულიყო, ასე უპასუხებდა: ,, თამუნა, სოფო მე ძალიან მიყვარს და გული მტკივა, ჩემს მეგობარზე ასე რომ ამბობ. თქვენ ჩემთვის ორივე ძალიან ძვირფასები ხართ და ორივენი მიყვარხართ. ძალიან მინდა, რომ ორივე იყოთ ჩემს დაბადების დღეზე. შენ არ ხარ ვალდებული, რომ ჩემსავით გიყვარდეს სოფო, მაგრამ როგორც ჩემს მეგობარს და სტუმარს, გამეხარდება, რომ კარგად შეხვდე.

შემდეგ ვსთავაზობ როლურ თამაშებს:

 ბავშვებს ვურიგებ ბარათებს, რომლებზეც წინასწარ მაქვს დაწერილი  სიტყვები: „თავდაჯერებული“, „გაუბედავი“,  „აგრესიული“. შევსთავაზებ პრობლემურ სიტუაციას და ვსთხოვ რეაგირებას არჩეული როლის შესაბამისად, თანაკლასელებმა კი უნდა გამოიცნონ, თუ რა როლი შეხვდა მათ თანაკლასელს.

შ ე ჯ ა მ ე ბ ა :

ვუხსნი, რომ პრობლემას ყოველთვის გაამწვავებს აგრესიული ქცევა, ხოლო ნაკლებად გაამწვავებს გაუბედავი ან თავდაჯერებული საქციელი. თავდაჯერებული ქცევის დროს მოსწავლეს ეძლევა შესაძლებლობა, არ შეილახოს მისი უფლება და დააფიქსიროს საკუთარი პოზიცია.